Hakagaunggang sin pakandagan sin LA,

Ha waypa napaawn in suga sin Akkal,

Awn suara bukun labtik dila'

Napas di' abutan pangita',

Pis siyabit - nag anyam sin katilingkal alam

Tanud gaib piyakay di' hikabayta'

Panji liyulupi' ha pakandangan hinnuk,

Kakana' bukun daying ha tanud—Kakana' Purna' iban Kasabunnalan

Daying ha pakandangan gaib, miyangsut in sahaya

Bukun hipanglungkup sa' dimihil palita' ha kubul gawunggang

Manga pangatayan hagpay na halaum katūgan sin damag iban dahit

Lambung kumaun pa bukug sin manga kalangan liyupa

Sahaya way Ngan, adapun simujud kaniya in katan ngan

Manga Kamaasan dimunggu'

nangura' ha Napas Kura' Sussi

Siki di' dumagpak pa gumi

limulupad ha taas hangin sin hikma way kiyalukis iban kiyasuara sin labtik dila'

In mata nila sapantun bituun limulurup ha laud sin dūm,

dimara panji itum——piyagtatampan sin Janji'

Wahai Panji Itum, bukun katigidluman sa' kabātinan

Yan ha katiblukan mu in Janji' sin babaan hangin

Halaum Liyupian mu-Lukis sin di' Pagkakitaan

Hurup Lapal bukun diyukut sin dawat,

Ha silawak sin manga nyawa himajat

kalimayahan

Timurun sila pa taas Būd Kamaasan (Bud Turisina),

Panumtum Purna' sapantun manga Sanga kahuy Zaytun mimikit ha batu

Didtu, hiyukut in kurah

In kamatay bukun na saput adapun lawang

In manga nangura' simūd ampa limiyu—-

Nag layag pa tampat way maka suku',

Nyawa makainum na sin kalimayahan,

kabuhi' magkalang ha bahasa hipus

mag sussi sin nyawa magpakpak bagunbun dunya

Magpapas sin kangan nganan way kasabunnalan

In Napas Dima nahinang Sū'

Su' sussi way lupa way dagbus way lapal suwara labtik dila'

Naglalayag nangura' di' kakitaan sin mata napissuk,

Dimara sin Panji sin Napas ha waypa in kaujud

Mamukaw sin manga nāhaluk nātutug ha kubul sin kabuga'

Magpukaw sin kakuyagan kiyatabunan sin salaksa' masa kasusahan

Wahai manga kiyaamanatan sin Gaib,

Layag kamu!

Tabuni niyu sin panji in suga,

Hasupaya makakita' kami sin Sahaya.